Rydym wedi cyflogi Economic Research Services (ERS) a Collingwood Environmental Planning (CEP) i gynnal gwerthusiad o’r rhaglen. Nod y gwerthusiad yw nodi, dadansoddi ac asesu effaith y 31 o brosiectau ar y cyd; gwerth ychwanegol y rhaglen; a yw wedi cyflawni ei huchelgeisiau tymor hir ac yn olaf, casglu tystiolaeth o effeithiau, arfer da a’r gwersi a ddysgwyd. Fel rhan o’r contract gwerthuso mae cyfres o adroddiadau a phapurau’n cael eu cynhyrchu:
Chwe phapur dysgu sydd i gael eu cyhoeddi ym mis Tachwedd 2021
Cynnwys pobl ifanc yn yr amgylchedd
Canlyniadau iechyd meddwl a lles i bobl ifanc
Canlyniadau sgiliau a chyflogadwyedd i bobl ifanc
Model rhaglen Our Bright Future
Dathliad dan arweiniad ieuenctid o effeithiau Our Bright Future ar yr amgylchedd a chymunedau
Pobl ifanc mewn swyddogaethau llywodraethu
Disgwylir i’r adroddiad craidd terfynol gael ei gyhoeddi ym mis Ionawr 2022.
Adroddiad Canol Tymor y Gwerthusiad
Pwrpas y cam gwerthuso canol tymor oedd adrodd ar yr hyn a gyflawnwyd ers dechrau’r rhaglen a nodi gwersi allweddol hyd yn hyn i sbarduno perfformiad gwell. Bwriad yr adroddiad hwn oedd hyrwyddo dysgu a chefnogi cyflwyno’r rhaglen yn y dyfodol, ynghyd â galluogi i’r rhaglen rannu canfyddiadau ag eraill. Y gobaith yw y gall y sylfaen dystiolaeth ar y cyd fod yn sail i raglenni tebyg yn y dyfodol a darparu gwell tystiolaeth o sut gall pobl ifanc wella eu hamgylchedd lleol, y gellir ei defnyddio fel sail i bolisïau ac arferion ehangach.
Canfyddiadau allweddol:
Roedd y rhaglen wedi ymgysylltu’n uniongyrchol ag 85,788 o bobl ifanc – yn llawer uwch na tharged gwreiddiol y rhaglen o 60,000 o bobl ifanc yn cymryd rhan yng ngweithgareddau Our Bright Future!
Mae pobl ifanc wedi dysgu gwybodaeth amrywiol a sgiliau newydd sy’n benodol i bynciau amgylcheddol, a sgiliau meddal a throsglwyddadwy mwy cyffredinol.
Mae’r prosiectau wedi gwella hunanhyder, lles ac iechyd meddwl y cyfranogwyr
Mae’r rhaglen yn cefnogi amrywiaeth eang o gynefinoedd ar y tir ac yn y môr, drwy amrywiaeth o dasgau cadwraeth. Mae nifer y llefydd sydd wedi’u gwella wedi rhagori ar darged gwreiddiol y rhaglen.
Mae rhaglen a phrosiectau Our Bright Future yn cymryd camau positif ymlaen tuag at ddylanwadu ar bolisi ac arferion. Mae’r cyflawniadau allweddol yn y cam canol tymor yn cynnwys y canlynol:
o Digwyddiad seneddol, yn cael ei gynllunio ar y cyd gan bobl ifanc a gyda 50 AS yn bresennol ynddo
o Pobl ifanc yn creu ‘Gofynion Polisi’ cydweithredol:
Treulio mwy o amser yn dysgu yn yr amgylchedd naturiol ac amdano
Cefnogaeth i gael swyddi amgylcheddol
Creu gofod i bobl ifanc gael eu clywed a chwarae rhan weithredol mewn cymdeithas
Yn ogystal â gwerthuso’r rhaglen, mae pob un o’r 31 o brosiectau’n cynnal gwerthusiadau o’u gwaith ac yn darparu adroddiadau gwerthuso terfynol. Cliciwch yma i gael rhestr o’r adroddiadau sydd ar gael i’w lawrlwytho.
‘Rydw i wrth fy modd yn cael bod yn yr awyr agored ac archwilio cefn gwlad hardd Sir Efrog gan gael effaith bositif arno hefyd’
Rydyn ni’n creu newid sylweddol yn ansawdd ein hamgylchedd trefol a gwledig. Mae gofod lleol yn cael ei drawsnewid i ddarparu hafan hanfodol i fywyd gwyllt yn ogystal â gwasanaethau hanfodol sy’n helpu i warchod cymunedau rhag newid hinsawdd. Rydyn ni’n gwella seilwaith lleol ac yn helpu adferiad natur.
POBL
Rydyn ni’n grymuso pobl ifanc i wneud cyfraniad cadarnhaol tuag at eu cymunedau drwy gyflwyno a dylanwadu ar eu prosiectau eu hunain sy’n gwella’r ardaloedd o’u hamgylch. Rydyn ni’n buddsoddi mewn cyfleoedd i sicrhau eu bod yn meithrin sgiliau, profiad a chyflogaeth i ddatblygu eu hunain fel arweinwyr amgylcheddol.
CYMUNEDAU
Rydyn ni’n ysbrydoli pobl o bob oedran, diwylliant a chefndir i ddod at ei gilydd a chyfrannu at amrywiaeth eang o weithgareddau gydag effaith cadarnhaol ac arhosol. Mae mentrau cymunedol lleol llwyddiannus yn cael eu sefydlu ar hyd a lled y DU ac mae pobl leol yn cael cyfoeth o fanteision i wella llefydd lleol.
YR ECONOMI
Gan ddefnyddio ein model o raglen arferion gorau, rydyn ni’n dangos y cyfleoedd a’r manteision a gynigir gan economi ‘werdd’ gynaliadwy sy’n gwneud defnydd effeithlon o adnoddau. Trwy wneud hynny, ein nod ni yw newid sut rydyn ni’n buddsoddi yn ein cymdeithas a gwneud yr economi werdd yn economi a ffafrir fel llwybr cyflogaeth ac addysg gan bobl ifanc.
