Fis diwethaf cafodd seminar flynyddol Our Bright Future 2018 ei chynnal. Ymgasglodd aelodau o staff a’r Fforwm Ieuenctid o bob cwr o’r DU yng Nghaerdydd i ddathlu’r rhaglen, dysgu oddi wrth ei gilydd a chynllunio ymlaen. Dyma’r Cydlynydd Rhannu Dysgu Gwella, Abi Paine, i rannu ei phrofiad.
Union fis i’r diwrnod wedi i mi ddechrau fel Cydlynydd Rhannu Dysgu Gwella gydag Our Bright Future, roeddwn i’n sefyll wrth ddrysau’r drydedd seminar pob prosiect flynyddol yn disgwyl i’r 31 prosiect roeddwn i wedi clywed cymaint amdanyn nhw gyrraedd. Ac waw! Fe gefais i fy synnu!
Roedd y bwrlwm o egni oedd yn cynyddu wrth i bob person neu dîm gyrraedd yr ystafell yn anhygoel – pobl yn cyfarch ei gilydd fel hen ffrindiau, yn cyflwyno staff newydd ac yn trafod beth oedd wedi digwydd yn ystod y flwyddyn ddiwethaf. Roedd rhai’n gwisgo crysau-T yn arddangos logos eu prosiect (oedd o help enfawr i mi fel newydd-ddyfodiad!) ac roedd aelodau’r Fforwm Ieuenctid yn dechrau cyrraedd yn eu hwdis gwyrdd llachar.
Wrth i’r ystafell lenwi gyda bron i 100 o bobl oedd wedi teithio o bob cornel o’r DU, roedd yn amlwg pa mor bwysig oedd hi i bawb yno deimlo’n rhan o’r mudiad mwy yma dros newid, a manteisio ar y cyfle i ddod at ei gilydd a rhannu. Nid dim ond rhannu cynnydd, ond hefyd rhannu heriau, awgrymiadau ar gyfer cydweithredu a syniadau ar gyfer gwaddol a’r dyfodol.
Roedd yn grêt gweld uchafbwyntiau y llynedd a gwybodaeth gan brosiectau unigol. Roedd wir yn dangos y momentwm sy’n adeiladu fel rhan o Our Bright Future, gyda rhai o’r bobl ifanc hynny a gymerodd ran fel gwirfoddolwyr yn y dyddiau caynnar nawr yn sicrhau prentisiaethau neu’n gweithio mewn swyddi yn y sefydliadau a daniodd eu hangerdd yn y lle cyntaf.
Fe glywson ni’r Fforwm Ieuenctid yn siarad am eu profiadau’n hyderus a brwd gan hudo’r gynulleidfa. Dyfyniad mawr y dydd i mi oedd yr un gan un aelod yn disgrifio ei amser yn aelod o’r fforwm ac fel rhan o brosiect:
Roedd hefyd yn dangos sut mae’r rhaglen yn creu cynnwrf ar lefel genedlaethol. Ar yr ail ddiwrnod, fe glywodd pawb am y gofynion polisi wedi’u crynhoi – y newidiadau allweddol yr hoffai’r bobl ifanc ar draws y prosiectau eu gweld mewn perthynas â’r amgylchedd. Roedd y trafodaethau a gafwyd wedyn yn cynnwys popeth o gynyddu cyfleoedd gwirfoddoli i wneud addysg yn wyrddach a sut byddai llywodraethau eraill yn ymateb i Ddeddf Llesiant Cenedlaethau’r Dyfodol Cymru.
Er bod agenda’r seminar yn orlawn, roedd yr ‘amser rhydd’ yn ymddangos yr un mor egnïol a llawn pwrpas. Roedd sgyrsiau am ymweliadau cyfnewid prosiectau, rhannu profiadau am ddenu grwpiau anodd eu cyrraedd a’r holl gymhelliant oedd yn cael ei greu o fod mewn ystafell yn llawn pobl oedd i gyd yn gweithio’n galed i gysylltu pobl ifanc â’r sector amgylcheddol.
Erbyn diwedd yr ail ddiwrnod (a dim ond jysd wedi dod dros y cwis enwog a gynhaliwyd gan Johnny o vInspired), roeddwn i’n teimlo ’mod i’n mynd i fyrstio. Nid dim ond am fy mod i’n llawn syniadau Rhannu Dysgu Gwella ond hefyd yn llawn ysbrydoliaeth – gan wybod bod yr holl bobl yma, a phawb sy’n ymwneud â’r rhaglen yn genedlaethol, yn cydweithio er lles dyfodol disglair i ni – Our Bright Future.